LLANES

Bones. Güei toca actualizar el blog, pero, como dicen, "too nun va ser trabayar" y a nós siempre nos presta pasalo bien. Por eso yá yera hora d'una salida toos xuntinos, y qué sitiu hai meyor que la costa asturiana pa pasar el día. Montamos nel bus cola comida y arrancamos pa Llanes.

Primer parada, Porrúa. Tocaba mercáu de ganáu, pero lo que ye mercar, nun mercamos nada. Entós decidimos dir de visita y el Muséu Etnográficu del Oriente d'Asturies taba esperándonos: la xente que lu lleva ye mui agradable y pasámoslo perbién; alcordámonos de munches coses que yá nun usamos y deprendimos otres nueves. Llamónos muncho l'atención esi árbol que tienen a la entrada.

Acabamos la nuesa visita en Porrúa xintando nuna plaza xunta la bolera. Dempués de xintar, entamamos a pensae qué podíemos facer dempués y ¿qué meyor qu'una visita a Gulpiyuri?  Tomamos el café y p'allá enfilamos.

El baile cuerre peles nuestres venes y tar viendo'l paisaxe ensin facer namás que semeyes nun yera suficiente. ¿Qué meyor que danzar na sablera? Pues a ello fuimos. ¿Nun mos creéis? Ta too grabao. Si nun recuerdo mal, hubo dalgún bañín o remoyase un poco, anque nun taba pa ello.

Esfrutamos lo que quiximos del paisaxe tan espectacular qu'hai per esa zona, y nosotros bailamos pero... si pudiéremos conocer a un grupu o a una bandina que-yos prestare'l folclor tanto como a nós... La banda del Llacín taba esperándonos colos brazos abiertos

Pudimos ver y nun zarramos la boca no que duró'l "tour" peles sos instalaciones, son impresionantes. Amás, los componentes de la banda deleitáronnos cola so música y la so simpatía.

Yá había fame, yera la hora cenar. Fuimos pal Cabañón, onde nos trataron como ún más de la familia, pudimos ver el llagar que tienen. Too nun va ser ver, había que prebar la sidra. Bailamos y tocamos lo que quiximos; hasta tirámonos dalguna qu'otra puya en forma coplilla, pero too con cariño.

Lo más prestoso, el día en compaña que pasamos, casi toos, porque hubo dalgunu que nun pudo dir, anque esos van tener un recuerdu prestosu del viaxe cuando nos oigan: "¿Alcuérdeste de cuando bailamos en Gulpiyuri? ¡Ah, ye verdá!, que tu nun fuisti."
Por: ALICIA CORTINA DÁVILA

 Los videos delos bailles puén velos nestos enllaces:
 NUN DEXEIS DE VESITAR LA NUESA CUENTA YOUTUBE