CONCIERTO DE MAYALDE

Tabemos ensayando un día de xineru, cuando entamando'l siguiente ensayu diz Sergio:
- El sábadu que vien nun cuntéis conmigo que nun voi venir ensayar.
Quedamos toos un pocu asina porque...eso ye bastante raru.
- Ye que vien Mayalde a Cenera.
- Meca!!!
L'ánxel de llau derechu dicíame que tenía que ser responsable y dir ensayar, pero'l diañu del llau esquierdu dicíame que pirara que Mayalde son bien bonos...hasta qu'escucho a Lolo dicir:
- Home, quedamos en que los ensayos tamién podemos facer a veces una actividá cultural, daqué que tenga que ver col folclore.

Semeya fecha por Mayalde

Y oye vi'l cielu abiertu, claro claro, podíamos dir, yo namás pudi ver una vegada un mini conciertu y quedé cola boca abierta, entos entamamos y el día 31 yá tábamos nel autobús en dirección a Cenera a la casa que tien l'Asociación Serondaya.
Llegamos con tiempu, que yá nos avisaron qu'aquello aína s'enllenaba.
Tienen ellí un local muy afayaizu, con una barra pequeñina pa que quites la sede y lo meyor de too chocolate pa quitar el fríu que diba esi día.
Y en esto empezó a enllenase de xente a asgaya!!!! y empieza el "conciertu" póngolo ente comillas porque aquello nun foi un conciertu al usu, aquello foi una clase d'Eusebio a un montón de xente con ganes d'aprender sobre la música y la tradición.
Yo non se cuanto duró al final la clase, pero al mio pasóseme como si fueren 10 minutos, tocaron de too, y cuando digo de too ye de too...con madreñes, con garbanzos, con un reclamu de falpayares, con una escoba, con una llata y un cayáu..lo dicho, con tou, nótase que-yos gusta enforma lo que faen porque esfruten y faenM esfrutar al públicu, inclusive con el ayudantes que se busquen (eh padrín!!!!!)

Yo nun tengo palabres pa describilo, namás puedo dicir que si tenéis oportunidá vaigáis a velos que nun vais a penar.

Dende equí quiero estimar a Asociaciones como Serondaya qu'anque l'ayuda económica que tienen nun ye enforma, faen unes actividaes bien interesantes, pa cualquier cosa que preciséis equí ta el G.F. Blimea pa echar un gabitu.
Aprovecho tamién pa dicivos qu'esti fin de selmana en La Nueva un pueblin de Llangreu, va a celebrase la primera Nueche en Danza, nel local que tienen l'Asociación Cultura y de Vecinos San Luis, si vos gusta esto del folclore, nun lo podéis perder.
Y lo más importante de too!!!! los díes 20, 21 y 22 de Marzu celebra la mundialmente conocida espicha del Grupu Folklórico "Blimea", nel local de Casa Fina, ¿qué nunca vinisti? entós ye que nun sabes lo que ye una espicha, esperámosvos a toos pa comer y beber, alcordavos tamién de traer los instrumentos, qu'en casa s'aburren.
31 de xineru de 2015
Asur Calleja Montes

LA FAMILIA MAYALDE AL COMPLETO